តែ២៤ម៉ោងដំបូងមានកុំព្យូទ័រ ១៤លានគ្រឿងដំឡើង Windows 10

ត្រឹមតែ ២៤ ម៉ោងដំបូងក្រោយការប្រកាស Windows 10 មានកុំព្យូទ័ររហូតដល់ទៅ ១៤លានគ្រឿងបានដំឡើងប្រព័ន្ធប្រតិបត្តិការថ្មីនេះបាត់ទៅហើយ។

បើតាមការបញ្ជាក់របស់ Microsoft ចំនួនយ៉ាងច្រើនត្រឹមតែ ២៤ម៉ោងដំបូងនេះ សរឱ្យឃើញពីការចាប់អារម្មណ៍ទៅលើការរចនាថ្មីនៅលើ Windows 10 ដែលបានប្រកាសកាលពីថ្ងៃពុធកន្លងទៅ ហើយខ្លួនក៏សង្ឃឹមថា OS ជំនាន់ថ្មីនេះនឹងអាចលាតសន្ធឹងនៅទូទាំងពិភពលោកនៅប៉ុន្មានថ្ងៃទៀត។

Windows 10 ត្រូវបានដាក់ឱ្យដំឡើងហ្វ្រីរយៈពេលមួយឆ្នាំពេញ ហើយមាន UI ថ្មីប្លែក គួរឱ្យទាក់ទាញ។ Cortana ដែលជាជំនួយការសំឡេងធ្លាប់តែមានលើ Smartphone Lumia ឥឡូវត្រូវបានដំឡើងលើ PC ហើយ Start Menu ដែលមិនមានលើ Windows 8/8.1 បានត្រឡប់មកវិញ ដោយផ្តល់ភាពងាយស្រួលច្រើនជាងមុន។ លើសពីនេះ Universal App និង Action Center និង Browser ថ្មី Microsoft Edge នៅលើ Windows 10 បានផ្តល់បទពិសោធថ្មីសម្រាប់អ្នកប្រើប្រាស់ ដោយខុសពី OS ជំនាន់មុនៗ៕