ក្រុមជើងខ្លាំង Bayern ស៊ុតបាល់ប៉េណាល់ទីកាត់សេចក្តីអត់ចូលទាំង ៤គ្រាប់

ក្រុមជើងខ្លាំងរបស់អាល្លឺម៉ង់ Bayern Munich បានបាត់បង់ឱកាសលើកពាន German Cup បន្ទាប់ពីចាញ់ក្រុម Borussia Dortmund ដោយបាល់ប៉េណាល់ទី ០-២ ក្នុងវគ្គពាក់កណ្ដាលផ្ដាច់ព្រ័ត្រ។ អ្វីដែលគួរឲ្យចាប់អារម្មណ៍ គឺក្រុមការពារតំណែងជើងឯកនេះ មិនអាចរកបានមួយគ្រាប់ណាឡើយ ក្នុងចំណោមគ្រាប់បាល់ប៉េណាល់ទីកាត់សេចក្ដីចុងក្រោយ។

ក្រុម Bayern Munich ជាអ្នករកគ្រាប់បាល់នាំមុខមុន នៅនាទីទី២៩ ដោយកីឡាករសញ្ជាតិប៉ូឡូញ Robert Lewandowski។ ក្រោយមក ក្រុម Borussia Dortmund បានវាយបកតាមស្មើវិញ នៅនាទីទី៧៥ ដោយកីឡាករ Aubameyang។ លទ្ធផល ១-១ នេះ បានរក្សារហូតដល់ចប់ការប្រកួត ៩០នាទីពេញ។ ចូលដល់ម៉ោងបន្ថែម ១៥នាទីពីរដង ក៏ក្រុមទាំងពីរមិនអាចទម្លាយសំណាញ់ទីគ្នាបន្ថែមបានឡើយ បើទោះវាយសម្រុកគ្នាទៅវិញទៅមកយ៉ាងណាក៏ដោយ។

ក្រុមទាំងពីរត្រូវស៊ុតបាល់ប៉េណាល់ទីកាត់សេចក្ដី ដើម្បីរកក្រុមមួយឡើងទៅវគ្គផ្ដាច់ព្រ័ត្រ។ ក្រុម Bayern Munich ស៊ុតខុសសំណាញ់ទី ៣គ្រាប់ និងត្រូវអ្នកចាំទីក្រុម Borussia Dortmund ជួយសង្គ្រោះបានមួយគ្រាប់។ ចំណែកក្រុម Borussia Dortmund វិញ បានស៊ុតបញ្ចូលទីតាំងពីពីរគ្រាប់ដំបូង និងត្រូវអ្នកចាំទីក្រុម Bayern Munich ជួយសង្គ្រោះបានមួយគ្រាប់។ ជាលទ្ធផល ក្រុម Borussia Dortmund បានឡើងទៅវគ្គផ្ដាច់ព្រ័ត្រពានរង្វាន់ German Cup ដោយយកឈ្នះបាល់ប៉េណាល់ទីកាត់សេចក្តី ២ ទល់នឹង ០។