ប្រព័ន្ធបកប្រែភាសាខ្មែរក្រុមហ៊ុនសេដ្ឋី Bill Gate ធ្វើមិនឲ្យចាញ់ Google Translate

ថ្មីៗនេះអ្នកតំណាង Microsoft នៅកម្ពុជាបានបង្ហើបពីដំណើរការកម្មវិធី Microsoft Translate Hub របស់ក្រុមហ៊ុនយក្ស Microsoft របស់សេដ្ឋី Bill Gate ដែលអាចបកប្រែភាសាខ្មែរទៅភាសាបរទេសផ្សេងៗ និង ពីភាសាបរទេសមកភាសាខ្មែរវិញមិនឲ្យចាញ់ Google Translate។

លោក Michael Strand តំណាង Microsoft បានឲ្យដឹងថា Microsoft Translator Hub គឺខាងលោកកំពុងតែដំណើរការបង្កើតប្រព័ន្ធបកប្រែភាសាខ្មែរបន្ទាប់ពីគម្រោងមួយនេះបង្ហើបឲ្យដឹងកាលពីកន្លះឆ្នាំមុនម្ដងរួចទៅហើយ។

លោកបន្តថា ការបង្កើតនេះមានរយៈពេលយូរដោយសារខាងក្រុមអ្នកបង្កើតជួបបញ្ហាមួយចំនួនដូចជា ការងារនេះពីមុនគឺមិនធ្លាប់មានហើយវាជាគម្រោងថ្មីមួយ និង ត្រូវការធ្វើតាមដំណាក់កាលព្រោះមិនមែនតែភាសាខ្មែរមួយទេត្រូវធ្វើគឺមានភាសាផ្សេងៗផងដែរ។ ម្យ៉ាងទៀត Microsoft ត្រូវការនិងការគាំទ្រពី ស្ថាប័នពាក់ព័ន្ធ មួយចំនួន ដើម្បីធ្វើឲ្យគម្រោងនេះអាចដំណើរការ និងទទួលបានជោគជ័យ។

Microsoft Translator Hub មានលក្ខណៈពិសេសដែលអាចបកប្រែបានយ៉ាងត្រឹមត្រូវ និងច្បាស់លាស់ ដោយបច្ចុប្បន្នប្រព័ន្ធបកប្រែដោយស្វ័យប្រវត្តិ ដែលកំពុងដាក់ប្រើប្រាស់នៅក្នុង Microsoft Translator Hub មានជាង ១០០ ភាសាមកហើយ ហើយភាសាខ្មែរនឹងមានបញ្ចូលនៅក្នុងប្រព័ន្ធបកប្រែនេះបើសិន គម្រោងនេះដំណើរការបានជោគជ័យ។

សម្រាប់ដំណើរការ Microsoft Translator Hub មិនបានបញ្ជាក់ថានឹងបញ្ចប់ និង ឲ្យប្រើប្រាស់លើភាសាខ្មែរនៅពេលណា។