Steven Gerrard បានចូលលេងឲ្យក្រុម Liverpool ឈុតធំរយៈពេល១៧ឆ្នាំ ចាប់តាំងពីឆ្នាំ១៩៩៨មក និងបានបង្ហាញខ្លួនសរុបជាង ៧០០ប្រកួត។ ប៉ុន្តែបើរាប់តាំងពីចូលហ្វឹកហាត់ តាំងពីវ័យកុមារមក កីឡាកររហស្សនាម “Captain Fantastic” រូបនេះ បានលេងឲ្យហង្សក្រហម អស់រយៈពេល២៨ឆ្នាំឯណោះ។
កីឡាករវ័យ៣៤ឆ្នាំ Gerrard ដែលនឹងផ្ទេរទៅកាន់ LA Galaxy ក្រោយចប់រដូវកាលនេះ បានក្លាយជាវីរបុរសក្លិបដែលបានមូលដ្ឋាននៅ Anfield មួយរូប នាពេលបច្ចុប្បន្ន និងមានអ្នកគាំទ្រជុំវិញពិភពលោកស្រលាញ់យ៉ាងច្រើន។ ចង់ដឹងថា ហេតុអ្វីបានជា Gerrard ក្លាយជាវីរបុរសរបស់ Liverpool ល្បីល្បាញដូចនេះដែរទេ? សូមទស្សនារឿងល្អៗ៨យ៉ាង របស់អតីតប្រធានក្រុមអង់គ្លេសខាងក្រោម ៖
១. ថ្ងៃចូលលេងដំបូង៖
នៅវ័យ១៨ឆ្នាំ Gerrard បានចូលលេងឲ្យ Liverpool ឈុតធំលើកដំបូង នៅថ្ងៃទី២៩ ខែវិច្ឆិកា ឆ្នាំ១៩៩៨ ដោយដូរជំនួស Vegard Heggem នាទី៨៩ ពាក់អាវលេខ២៨។
២. ស៊ុតគ្រាប់ដំបូងឲ្យ Liverpool៖
Gerrard ស៊ុតគ្រាប់ដំបូងឲ្យ Liverpool នៅកីឡដ្ឋាន Anfield អំឡុងពេលប្រកួតទល់នឹង Sheffied Wednesday កាលពីថ្ងៃទី០៥ ខែធ្នូ ឆ្នាំ១៩៩៩។
៣. ស៊ុតគ្រាប់អស្ចារ្យទល់ Olympiakos៖
គ្រាប់បាល់ដ៏អស្ចារ្យរបស់ Gerrard ទល់នឹង Olympiakos មានន័យថា Liverpool អាចឡើងវគ្គបន្ត Champions League។
៤. ឈ្នះជើងឯកកំពូលអឺរ៉ុប ក្រោយវាយបកឈ្នះ AC Milan៖
រឿងដ៏អស្ចារ្យបំផុត គឺ Gerrard បានដឹកនាំក្រុមវាយបក តាមពីក្រោយ AC Milan ៣-០ រហូតទាល់តែឈ្នះពានរង្វាន់ UEFA Champions League ដោយបាល់ប៉េណាល់ទីកាត់សេចក្ដី កាលពីឆ្នាំ២០០៥។
៥. ស៊ុត hat-trick ក្នុងការប្រកួត Derby៖
នៅពេលដែលសារព័ត៌មាន Liverpool Echo សួរថា អ្វីដែលធ្វើឲ្យលោកមិនអាចបំភ្លេចបាននៅ Anfield, Gerrard ឆ្លើយថា៖ “គឺការប្រកួតទល់នឹង Everton ដែលខ្ញុំបានស៊ុត hat-trick”។
៦. ស៊ុត Man Utd នៅ Anfield កាលពីឆ្នាំ២០០១៖
គ្រាប់បាល់ ដែលធ្វើឲ្យពិភពលោកមានការភ្ញាក់ផ្អើល គឺគ្រាប់របស់ Gerrard ស៊ុត Man Utd កាលពីឆ្នាំ២០០១ ដែលជួយឲ្យហង្សក្រហម Liverpool ឈ្នះ ២-០ និងជាជ័យជម្នះលើបិសាចក្រហម លើកដំបូងក្នុងទឹកដីខ្លួនឯង រយៈពេល៦ឆ្នាំ។
៧. ភាពស្មោះស្ម័គ្រ៖
Gerrard មានជម្រើសល្អៗជាច្រើន ដែលនឹងអាចចេញពី Liverpool ដូចជា Real Madrid, Inter Milan និង Chelsea ដែលជាក្លិបជិតទិញ Gerrard បានមែនទែន ប៉ុន្តែ Gerrard នៅតែបន្តជាមួយហង្សក្រហម។
៨. ថ្ងៃលាគ្នានៅ Anfield ចុងក្រោយ៖
ក្នុងការប្រកួតទឹកដីខ្លួនឯងចុងក្រោយ នៅ Anfield ទល់នឹងក្រុម Crystal Palace កាលពីថ្ងៃទី១៦ ខែឧសភានេះ ពិតជាថ្ងៃដែលក្ដុកក្ដួលបំផុតរបស់ Gerrard និងអ្នកគាំទ្ររបស់ក្លិប៕
ចុះប្រិយមិត្តគិតថា Gerrard នៅមានរឿងល្អៗអ្វីខ្លះទៀតដែរទេ?
Sign up here with your email
Conversion Conversion Emoticon Emoticon