គ្រូអាហ្វហ្គានីស្ថានថា យក៣ពិន្ទុដាច់ខាត ឯគ្រូកម្ពុជានៅតែបារម្ភ

លោក Slaven Skeledzic គ្រូបង្គោលរបស់ក្រុមជម្រើសជាតិ អាហ្វហ្គានីស្ថាន បានលើកឡើងថា ក្រុមរបស់លោកមកកម្ពុជាត្រូវតែយក ៣ ពិន្ទុដាច់ខាត ស្របពេលគ្រូបង្វឹកកម្ពុជាលោក Ohara នៅមានការព្រួយបារម្ភសម្រាប់ជំនួបកូនក្រុមរបស់លោកទទួលភ្ផៀវក្រុមអាហ្វហ្គានីស្ថានវេលាម៉ោង ៦ :៣០ នាទីយប់នេះនៅពហុកីឡដ្ឋានជាតិអូឡាំពិកក្នុងវគ្គជម្រុះបាល់ទាត់ពិភពលោកឆ្នាំ ២០១៨នៅប្រទេសរុស្សី ។

លោក Slaven Skeledic

លោក Slaven Skeledzic បានឲ្យដឹងក្នុងសន្និសីទសារព័ត៌មានកាលពីព្រឹកថ្ងៃ ច័ន្ទ ម្សិលមិញថា ក្រុមរបស់លោកមកកម្ពុជាដើម្បីយក៣ពិន្ទុប្រជែងនឹងក្រុមដទៃដែលនៅក្នុងពូល E ឡើងទៅវគ្គបន្ត។ របៀបនៃការលេងរបស់កម្ពុជាមានភាពរហ័សនៅតំបន់ប្រយុទ្ធដូចនេះ កូនក្រុមរបស់លោកនៅតំបន់ការពារត្រូវនៅឲ្យបានជិតៗ គ្នាដើម្បីការពារបាល់ពេលក្រុមកម្ពុជាគ្រប់គ្រងបាល់នៅមុខទីរបស់ពួកគេ ហើយព្យាយាមវាយបកឲ្យមានប្រសិទ្ធភាពបំផុត។

លោកបានបន្តថា ក្រុមរបស់លោកនឹងផ្លាស់ប្ដូរកីឡាករឆ្នើមៗ មួយចំនួនដែលទើបជាពីរបួសឲ្យចូលលេងវិញក្នុងការប្រកួតដ៏សំខាន់នេះ ខណៈកាលជំនួបជាមួយស៊ីរីបានខកខានឱកាសម្ដងហើយ ពីព្រោះបញ្ហាកីឡាករសំខាន់ៗរបួស។ ចំណែកបញ្ហាដ៏សំខាន់មួយទៀតគឺសំឡេងរំខានពីអ្នកគាំទ្រ ប្រសិនបើមានអ្នកគាំទ្រច្រើនដូចថ្ងៃកម្ពុជាប្រកួតជាមួយសិង្ហបុរី លោកព្រួយថា មិនអាចបញ្ជាកូនក្រុមរបស់លោកពេលកំពុងប្រកួតឲ្យធ្វើអ្វីតាមការគ្រោងទុករបស់លោកបានល្អ។

លោក Slaven Skeledzic បាននិយាយថា ៖« ពួកយើងមកកម្ពុជាដើម្បីយក ៣ ពិន្ទុ ដូចនេះមិនអាចស្មើឡើយ ហើយក្រុមរបស់ខ្ញុំនឹងធ្វើឲ្យបាន»។ លោកបន្តថា ក្រុមរបស់លោក និងក្រុមកម្ពុជាពិតជាមិនអាចមានគ្រាប់បាល់ច្រើនឡើយគឺច្រើនបំផុតត្រឹមលទ្ធផល ២-១ ឬ ២-០ ប៉ុណ្ណោះ ព្រោះក្រុមទាំងពីក្ដោបសំខាន់ត្រង់ការការពារ។

ជាមួយគ្នានោះលោក Kazunori Ohara គ្រូបង្គោលជម្រើសជាតិកម្ពុជាក៏បានលើកឡើងដែរថា ក្រុមរបស់លោកបានត្រៀមខ្លួនដោយជ្រើសរើសយកកីឡាករពីក្រុម U-23 មួយចំនួនមកជួយក្រុម។ ការដាក់បញ្ចូលកីឡាករពីក្រុម U -23 លាយចូលជាមួយឈុតធំនេះធ្វើឲ្យលោកកើតការព្រួយបារម្ភថា ពួកគេមិនអាចលេងស៊ីចង្វាក់គ្នាល្អ ពីព្រោះពួកគេហ្វឹកហាត់ជាមួយគ្នាមានរយៈពេលខ្លីពេក។

ទោះបីជាយ៉ាងណា កីឡាករ គួច សុកុម្ភៈ ប្រធានក្រុមជម្រើសជាតិបាននិយាយថា ពួកគេគ្មានបារម្ភរឿងលេងមិនល្អជាមួយសមាជិកខ្លះពីឈុត U-23 ឡើយ ពីព្រោះពួកគេធ្លាប់ហ្វឹកហាត់ និងលេងជាមួយគ្នាជាច្រើនមកហើយ ហើយពួកគេនឹងខំប្រឹងឲ្យអស់ពីសមត្ថភាព៕