iOS 9 នឹង​បង្ហាញ​ខ្លួន​នៅ​រាត្រី​នេះ​ហើយ! តើ​វា​មាន​លក្ខណៈ​អ្វី​ពិសេស​​ខ្លះ​ទៅ?

នៅរាត្រីថ្ងច័ន្ទ ឆ្លងចូលថ្ងៃអង្គារ៍នេះ ព្រឹត្តិការណ៍ WWDC ដ៏ពិសេសប្រចាំឆ្នាំ របស់ Apple នឹងប្រព្រឹត្តិទៅហើយ ដែលខ្លួននឹងធ្វើការជួបជុំជាមួយ នឹងអ្នកអភិវឌ្ឈន៍ Software ពិសេសៗជាច្រើន ហើយនៅពេលនេះដែរ Apple ក៏មានអ្វីពិសេសៗ សម្រាប់ដាក់បង្ហាញ ផងដែរ។ ទោះបីជា Apple មិនបានបញ្ជាក់ប្រាប់ យើងថានឹងមានអ្វី សម្រាប់ដាក់បង្ហាញនោះ យើងក៏ដឹងដែរថា គឺនឹងមាន ប្រព័ន្ធប្រតិបត្តិការណ៍ iOS 9 (សម្រាប់សាកល្បង) ប្រព័ន្ធប្រតិបត្តិការណ៍ OS X និងអ្វីពិសេសៗ ជាច្រើនទៀត។

តើ iOS 9 នឹងមានអ្វីប្លែក និងថ្មីខ្លះទៅ? ខាងក្រោមនេះ គឺជាលក្ខណៈពិសេសរបស់វា ដែលប្រភពគួរអោយទុកចិត្ត ជាច្រើន បានបង្ហើបអោយយើងដឹង។

1. ផ្លាស់ប្តូរពុម្ពអក្សរថ្មី

 

iOS 9 នឹងផ្លាស់ប្តូរទៅប្រើប្រាស់ ពុម្ពអក្សរ San Francisco ដែលមានទំរង់ ធំ ដិត និងវែងជាង ពុម្ពអក្សរនៅលើ iOS 7/8។ ពុម្ពអក្សរថ្មីនេះ អាចអោយអ្នក មានអារម្មណ៍ថាប្លែក ជាងមុន។ យ៉ាងណាមិញ វានៅតែមានមុខមាត់ រចនាបថ ដូចទៅនឹង iOS 8 ដដែល គ្មានអ្វីខុសប្លែកឡើយ។

2. កម្មវិធី Apple Map មានបន្ថែមមុខងារ ប្រាប់ទិសដៅ ដូច Google Map ដែរ

Apple Map បានបង្ហាញខ្លួននៅឆ្នាំ 2012 ដើម្បីធ្វើជាគូរប្រជែង ជាមួយ Google ហើយជំនាន់ថ្មីនេះ វាបានបន្ថែម មុខងារប្រាប់ ទិសដៅទីកន្លែង ដែលអ្នកចង់ទៅ។ វានឹងប្រាប់ អំពីចំងាយផ្លូវ ដែលអ្នកត្រូវធ្វើដំណើរ កន្លែងត្រូវបត់ នានា ជាដើម។

3. អ្នកប្រើប្រាស់​ iPad អាចប្រើកម្មវិធី ពីរ នៅលើផ្ទៃអេក្រង់តែមួយ ព្រមគ្នាបាន

 

ទីបំផុត ថេប្លេត iPad កាន់តែមានលក្ខណៈពិសេស ជាងមុនហើយ ជាមួយនឹង មុខងារថ្មីមួយនេះ ដែលវាអនុញ្ញាត្តិអោយយើង ប្រើប្រាស់កម្មវិធី ពីរនៅលើអេក្រង់ តែមួយបាន។ យើងអាចផ្ទេរ ឯកសារពីកម្មវិធីមួយ ទៅកម្មវិធីមួយ អាចមើលវីដេអូបណ្តើរ និងប្រើប្រាស់ អ៊ីនធឺណែត​ បណ្តើរក៏បាន។

4. កម្មវិធីតន្ត្រីមាន ភ្ជាប់មកជាមួយ សេវាកម្ម ស្តាប់តន្ត្រី

 

កម្មវិធី Music របស់ iOS 9 មានរចនាបថថ្មី ហើយវាក៏មាន មុខងារស្តាប់តន្ត្រី និងវីដេអូថ្មី ផងដែរ។ សេវាកម្មនេះ ត្រូវបានចូលរួម បង្កើតឡើងដោយ ក្រុមហ៊ុន Beats។ សេវាកម្ម តន្ត្រីនេះ អាចអោយអ្នក ស្តាប់តន្ត្រីបាន ដោយសេរី ក៏ប៉ុន្តែ ត្រូវបង់សេវាកម្ម ជាខែ។

Apple នឹងយកចិត្តទុកដាក់ បង្កើតប្រព័ន្ធប្រតិបត្តិការណ៍ iOS ជំនាន់ទី 9 នេះអោយវា ដំណើរការ បានដោយរលូន រហ័សល្អ និងមានស្ថេរភាព ជាជាងបន្ថែម មុខងារថ្មីៗលើវាអោយកាន់ តែច្រើន។ យើងធ្លាប់ដឹងមកហើយថា ចាប់តាំងពី iOS 7 មក ឧបករណ៍ iDevice មិនអាចដំណើរការ បានស្រួលនោះទេ ពោលមានភាព រអាក់រអួលជានិច្ច។ ប្រភពសំងាត់ មួយចំនួន ក៏បានបង្ហើប ដែរថា iPhone 4s/ iPad 2/ iPad mini 1 គឺមានលទ្ធភាព អាចដំណើរការ iOS 9។

សូមរង់ចាំ តាមដាន​ នូវការផ្សាយបន្តផ្ទាល់ ព្រឹត្តិការណ៍ WWDC របស់ Apple នារាត្រី វេលាម៉ោងប្រហែល 00:00 រំលងអាធ្រាត នេះទាំងអស់គ្នាណា ដើម្បីអ៊ុតមើលថា តើប្រព័ន្ធប្រតិបត្តិការណ៍ ថ្មីរបស់ Apple នេះ វាមានអ្វី ប្លែក និងពិសេសខ្លះទៅ? គូសបញ្ជាក់ផងដែរថា iOS 9 នេះ គឺស្ថិតនៅក្នុង ដំណាក់កាល សាកល្បងនោះទេ ហើយអ្នកត្រូវរង់ចាំ ដល់ខែសីហា ទើបអាចប្រើប្រាស់ បានជាសាធារណៈ។

ប្រពភពី ៖ Cambo-Report

• Tweet
• Share
• Share
• Share
• Share

Sign up here with your email