Apple ត្រូវគេដឹងថា កំពុងលួចផលិត Software កាមេរ៉ាភ្លោះ iPhone ៣ឆ្នាំមកហើយ

ពាក្យចចាមអារ៉ាមពាក់ព័ន្ធនឹង iPhone ជំនាន់ក្រោយរបស់ Apple គឺនៅតែមានជាបន្តបន្ទាប់។ ខែមុនមានព័ត៌មានលេចធ្លាយពីរូបភាពរបស់ iPhone ដែលបំពាក់ជាមួយនឹងកាមេរ៉ាភ្លោះនៅផ្នែកខាងក្រោយ។ ឥឡូវនេះមានរបាយការណ៍ថ្មីមួយបង្ហាញថា Apple បានកំពុងធ្វើការផលិតបច្ចេកវិទ្យានេះអស់រយៈពេលប៉ុន្មានឆ្នាំមកហើយ។

សារព័ត៌មាន Business Weekly របស់តៃវ៉ាន់បានបញ្ជាក់ថា ក្រុមហ៊ុន Apple កំពុងធ្វើការផលិតកម្មវិធី Software សម្រាប់កាមេរ៉ាភ្លោះនេះតាំងពីបីឆ្នាំមុនមកម្ល៉េះ។ ជាមួយគ្នានោះដែរ លោក Xiaru Wen នាយកប្រតិបត្តិក្រុមហ៊ុន Altek ដែលជាក្រុមហ៊ុនផលិតសិនស័ររូបភាពរបស់កាមេរ៉ាសម្រាប់ទូរសព្ទ Smartphone ដូចជា One (M8) និង M9+ របស់ HTC រួមទាំង Honor 6 Plus របស់ក្រុមហ៊ុន Huawei ផងនោះបានបញ្ជាក់ថា Apple គឺបានផលិត Software សម្រាប់កាមេរ៉ាភ្លោះនេះរួចហើយ ប៉ុន្តែខ្លួននៅរង់ចាំតែគ្រឿង Hardware តែប៉ុណ្ណោះ។

របាយការណ៍បានបញ្ជាក់ទៀតថា កន្លងទៅ Apple មិនបានផលិត iPhone មានកាមេរ៉ាភ្លោះទេដោយសារតែគ្មានគ្រឿង Hardware ប៉ុន្តែសម្រាប់ iPhone ជំនាន់ក្រោយ ( iPhone 7) ប្រហែលជាមានកាមេរ៉ាភ្លោះ៕