គ្រូបង្វឹកក្រុមកម្ពុជា និងសិង្ហបុរី រំពឹងធ្វើបានល្អដូចគ្នា ជម្រុះ World Cup យប់នេះ

គ្រូបង្វឹកក្រុមបាល់ទាត់ជម្រើសជាតិកម្ពុជា និងគ្រូបង្វឹកក្រុមជម្រើសជាតិសិង្ហបុរីសុទ្ធតែអះអាងថា កូនក្រុមរបស់លោកនឹងធ្វើបានល្អដូចគ្នាសម្រាប់ការប្រកួតជម្រុះបាល់ទាត់ពិភពលោកឆ្នាំ២០១៨ ជើងទីមួយនៅវេលាម៉ោង៦:៣០នាទីយប់នេះនៅពហុកីឡដ្ឋានជាតិអូឡាំពិក។

លោក Kazunori Ohara គ្រូបង្វឹកបាល់ទាត់កម្ពុជា

ថ្លែងនៅក្នុងសន្និសីទសារព័ត៌មានកាលពីថ្ងៃត្រង់នេះនៅសហព័ន្ធកីឡាបាល់ទាត់កម្ពុជា លោក Kazunori Ohara គ្រូបង្វឹកបាល់ទាត់កម្ពុជាជនជាតិជប៉ុនបានលើកឡើងថា លោករំពឹងទុកថា ក្រុមរបស់លោកធ្វើបានល្អសម្រាប់ការប្រកួតនៅយប់នេះ ពីព្រោះក្រុមរបស់លោកបានត្រៀមខ្លួនយ៉ាងល្អរយៈពេលជាងមួយខែមកហើយ។

លោកប្រាប់ថា ៖«យើងបានត្រៀមខ្លួនជាងមួយខែហើយ កីឡាករទាំងអស់បានហ្វឹកហាត់ជុំគ្នា និងយល់ចិត្តគ្នាបានច្រើនជាងមុន។ ទម្រង់លេងរបស់យើងល្អជាងមុន យើងបានកែលំអចំណុចខ្វះខាតពេលប្រកួតជាមួយឡាវ និយាយរួមលទ្ធផលស្មើនឹងឡាវ និងឈ្នះមីយ៉ាន់ម៉ា១-០ជាលទ្ធផលដែលក្រុមយើងបានត្រៀមខ្លួនកន្លងមក»។

ចំណែក គួច សុកុម្ភៈ ប្រធានក្រុមជម្រើសជាតិកម្ពុជាបានសំណូមពរដល់អ្នកគាំទ្រកម្ពុជាសូមចូលរួមទស្សនាឲ្យបានច្រើនកុះករដើម្បីលើកទឹកចិត្ត និងផ្តល់កម្លាំងចិត្តដល់ក្រុមកម្ពុជា ហើយលោកបានប្តេជ្ញាប្រឹងឲ្យអស់ពីលទ្ធភាពដើម្បីនាំជ័យជម្នះ។

សុកុម្ភៈនិយាយថា ៖«ពួកខ្ញុំនឹងប្រឹងប្រែងឲ្យអស់ពីសមត្ថភាពដើម្បីស្វែងជ័យជម្នះជូនជាតិ»។

លោក Bernd Walter Stange គ្រូបង្វឹកជម្រើសជាតិសិង្ហបុរី

ចំពោះលោក Bernd Walter Stange គ្រូបង្វឹកជម្រើសជាតិសិង្ហបុរីជនជាតិអាល្លឺម៉ង់បានឲ្យដឹងដែរថា កូនក្រុមរបស់លោកក៏ត្រៀមខ្លួនបានល្អដែរសម្រាប់រយៈពេលប៉ុន្មានខែចុងក្រោយនេះដោយប្រកួតមិត្តទាំងកន្លងមកគឺចាញ់តែក្រុមជម្រើសជាតិថៃ២-០ប៉ុណ្ណោះ។

លោកបានបញ្ជាក់ថា ថ្វីបើក្រុមសិង្ហបុរីធ្លាប់បានយកឈ្នះក្រុមកម្ពុជា២-០ ដោយស្រួលពេលប្រកួតជម្រុះ Suzuki Cup កន្លងមក ប៉ុន្តែពេលនេះក្រុមកម្ពុជារីកចម្រើនច្រើនដែលកូនក្រុមរបស់លោកត្រូវតែប្រុងប្រយ័ត្ន។ លោកថា ៖«យើងមិនអាចមើលស្រាលដៃគូបានទេ ព្រោះក្រុមកម្ពុជារីកចម្រើនគួរឲ្យចាប់អារម្មណ៍ ពិសេសថ្មីៗនេះ ក្រុមកម្ពុជាទើបតែយកឈ្នះក្រុមមីយ៉ាន់ម៉ា១-០។ យើងមិនត្រូវធ្វេសប្រហែសចំពោះតំបន់ប្រយុទ្ធ និងបម្រើរបស់កម្ពុជាឡើយ»។

ទោះបីជាយ៉ាងណា គ្រូបង្វឹកទាំងពីរសុទ្ធតែមិនហ៊ានអះអាងថា តើប៉ុន្មានភាគរយដែលកូនក្រុមរបស់លោកទាំងពីរទទួលបានជ័យជម្នះនោះ ប៉ុន្តែសុទ្ធតែរំពឹងថា ធ្វើបានល្អដូចគ្នា។ ចំពោះជើងកីឡាករវិញ គ្រូទាំងពីរសុទ្ធតែអះអាងថា កូនក្រុមរបស់លោកគ្មានបញ្ហាអ្វីនោះទេពោលគឺពេញជើងល្អដូចគ្នា៕