ប្រេស៊ីលចុកឈាម ធ្លាក់ Copa America ៨ក្រុមចុងក្រោយ ឯប៉ារ៉ាហ្គាយបន្តជួបអាហ្សង់ទីន

ក្រុមខ្លាំងសំបាប្រេស៊ីលបានធ្លាក់ពីពានរង្វាន់ Copa America នៅត្រឹមវគ្គ៨ក្រុមចុងក្រោយដោយថ្វីជើងក្រុមប៉ារ៉ាហ្គាយដោយលទ្ធផលប៉េណាល់ទី ៤-៣ បន្ទាប់បញ្ចប់៩០នាទីដោយលទ្ធផល ១-១។

សង្គ្រាមលើវាលស្មៅរបស់ក្រុមទាំងពីរពិតជាតឹងតែងដោយក្រុមប្រេស៊ីលដែលអវត្តមានតារាឆ្នើម Neymar បានទម្លាយសំណាញ់ទីក្រុមប៉ារ៉ាហ្គាយមុននៅនាទី១៥ដោយកីឡាករ Robinho ។ ក្តីសង្ឃឹមឡើងវគ្គពាក់កណ្តាលផ្តាច់ព្រ័ត្ររបស់ប្រេស៊ីលបានស្តួចស្តើងវិញ បន្ទាប់ពី Derlis Gonzalez បានទាត់បាល់ពិន័យ១១ម៉ែត្របានសម្រេចឲ្យប៉ារ៉ាហ្គាយតាមស្មើនៅនាទី៧២។ ចប់៩០នាទី ក្រុមទាំងពីរនៅតែរក្សាលទ្ធផល ១-១។

ដើម្បីស្វែងរកក្រុមឡើងទៅវគ្គពាក់កណ្តាលផ្តាច់ព្រ័ត្រ ការប្រកួតរបស់ក្រុមទាំងពីរត្រូវទាត់បាល់កាត់សេចក្តី។ ជាលទ្ធផល ក្រុមប៉ារ៉ាហ្គាយជាអ្នកឡើងទៅជួបក្រុមអាហ្សង់ទីននៅវគ្គពាក់កណ្តាលផ្តាច់ព្រ័ត្រ បន្ទាប់ពីឈ្នះបាល់កាត់សេចក្តីលើប្រេស៊ីលដោយលទ្ធផល ៤-៣។