ក្រោមតំណក់ទឹកភ្លៀង អ្នកគាំទ្រច្រើនលើសលប់ហួសពីការស្មានយប់មិញនៅអូឡាំពិក

អ្នកគាំទ្របាល់ទាត់កម្ពុជានៅពហុកីឡដ្ឋានជាតិអូឡាំពិកកម្ពុជាកាលយប់មិញនេះច្រើនហួសពីការស្មានដើម្បីលើកទឹកចិត្តដល់ក្រុមបាល់ទាត់ជម្រើសជាតិរបស់ខ្លួនពេលប៉ះក្រុមជម្រើសជាតិឡាវសម្រាប់ការប្រកួតមិត្តភាពអន្តរជាតិ បើទោះជាមុនការប្រកួតមានអ្នកគាំទ្រមួយចំនួនត្អួញត្អែរថា សំបុត្រថ្លៃបន្តិច។

លោក សៅ សុខា ប្រធានសហព័ន្ធបាល់ទាត់កម្ពុជាបានលើកឡើងថា ពេលនេះការខំប្រឹងប្រែងរបស់សហព័ន្ធ និងកីឡាករជម្រើសជាតិបាល់ទាត់កម្ពុជាទាំងអស់កំពុងទទួលបានផ្លែផ្កាហើយ ព្រោះបើប្រៀបធៀបនឹងប៉ុន្មានឆ្នាំមុន ពេលប្រកួតគ្មានអ្នកទស្សនាឡើយ ប៉ុន្តែពេលនេះ ទោះមានភ្លៀងកំពុងធ្លាក់ក៏អ្នកគាំទ្រនៅជួយលើកទឹកចិត្តពេញស្តាត និងនៅទស្សនាការប្រកួតរហូតដល់ចប់។

សម្រាប់អ្នកទស្សនាការប្រកួតកាលពីយប់មិញយ៉ាងហោចណាស់ក៏មានអ្នកទស្សនាប្រហែលជា២ម៉ឺននាក់ដែរ ប៉ុន្តែភាគច្រើនទិញសំបុត្រចូលទស្សនានៅតំបន់តម្លៃ៥ពាន់រៀល និង១ម៉ឺនរៀល៕