អ្នកចាំទី Gianluigi Buffon របស់ក្រុម Juventus បានប្រាប់ថា ខ្សែប្រយុទ្ធ Lionel Messi គឺជាមនុស្សក្រៅភព ដែលប្រែកាយមកជាមនុស្សធម្មតា ទើបមានសមត្ថភាពអស្ចារ្យដូចសព្វថ្ងៃនេះ។
មុនសង្គ្រាមលើវាលស្មៅរវាងក្រុមយក្សអេស្ប៉ាញ Barcelona និងក្រុមយក្សអ៊ីតាលី Juventus ដណ្ដើមពានរង្វាន់ UEFA Champions League ចាប់ផ្ដើមនៅថ្ងៃទី៦ មិថុនាចុងសប្ដាហ៍នេះ ចាំទីរបស់ក្រុមសេះបង្កង់បាននិយាយថា ទ័ពស្រួច Messi របស់ក្រុមអ្នកមានបុណ្យប្រៀបដូចជាមនុស្សក្រៅភពអីចឹង ទើបពិបាកមានខ្សែការពារណាមកបិទគេជិត។
“Messi ជាមនុស្សក្រៅភព ដែលប្រែកាយមកជាមនុស្សធម្មតារស់នៅលើផែនដីនេះ។ ក្ដីសង្ឃឹមតែមួយគត់របស់ខ្ញុំក្នុងប្រកួតថ្ងៃសៅរ៍នេះគឺគាត់នឹងមានសមត្ថភាពដូចមនុស្សធម្មតា មិនមែនខ្លាំងដូចមនុស្សក្រៅភពទេ។ យើងនឹងព្យាយាមប្រើកាំភ្លើងរបស់យើងឱ្យអស់ពីសមត្ថភាព ដើម្បីបញ្ឈប់ពួកគេ”។ អ្នកចាំទីវ័យ៣៧ឆ្នាំបានបញ្ជាក់បន្ថែម។
ម្ចាស់ពាន Ballon d’Or ៤សម័យ Lionel Messi រដូវកាលនេះបានបង្ហាញទម្រង់លេងអស្ចារ្យខ្លាំង ដោយអាចជួយក្រុមឈ្នះពាន២រួចទៅហើយរដូវកាលនេះគឺ La Liga និង Copa del Rey របស់អេស្ប៉ាញ។ Barca ឡើងមកដល់វគ្គផ្ដាច់ព្រ័ត្រពានរង្វាន់ Champions League ក៏មានចំណែកតារាវ័យ២៧ឆ្នាំរូបនេះច្រើនផងដែរ ដោយរូបគេជាអ្នកជួយក្រុមឈ្នះ Manchester City , Bayern Munich និង PSG ជាដើម។ ចំណែកឯអ្វីដែលធ្វើឱ្យអ្នកស្រលាញ់កីឡាបាល់ទាត់មិនអាចភ្លេចគេបាននោះគឺការអូសបាល់ដាច់កីឡាករ៥ទៅ៦នាក់ពីពាក់កណ្ដាលទីលានមកស៊ុតបញ្ចូលទីតែម្ដង ក្នុងប្រកួតផ្ដាច់ព្រ័ត្រពានរង្វាន់ Copa del Rey ជាមួយ Athletic Bilbao ៕
ប្រែសម្រួល៖ មុន្នី រម្យ
ប្រភព៖ mirror
ប្រភព៖ mirror
Sign up here with your email
Conversion Conversion Emoticon Emoticon